Mushroom risotto

        

做呢個蘑菇意大利飯其實好簡單，材料不需很多，需要的只是耐性。大家不妨試試吧，很好味呢！

材料：

牛油 20g

乾䓤 5-6粒（切小粒）

蒜茸 1湯匙

蘑菇（隨個喜好，我用有機大蘑菇兩大隻）

白酒 半杯

清雞湯 800ml（煮熱）

意大利米 2杯

做法：

1. 熱了鍋後，落牛油，炒香乾䓤，蒜蓉和蘑菇，加少許鹽和黑胡椒。

2. 下意大利米，慢慢攪拌，鑽上白酒，這時候會聞到陣陣香味。

3. 慢慢加入雞湯，要每次逐少加及一邊攪拌，開始收水就再加雞湯。

4. 一直保持攪拌及加湯，煮大約半小時。然後蓋上焗2-3分鐘即成。上碟前可拌入少許Parmesan cheese及黑胡椒。

甜脆小餐飽

阿嘈夫人早排掛住煲星星劇，少咗處理個 blog, 真的不好意思呀！亦都可能煲得太勁，有次睇睇吓部 laptop 突然好次星星咁一閃就成個screen黑哂，搶救無效... 

上星期去咗學整飽，覺得始終要去上吓堂才學到啲心得，之前只係睇書跟住做點都係欠了一些似的。

材料：

高筋粉 130g

砂糖 1.5湯匙

鹽 1茶匙

無鹽牛油 30g

酵母菌 3/4 茶匙

温和暖水 75ml

飽面甜醬：

無鹽牛油 15g

砂糖 20g

蛋液 15g

呍呢嗱油 數滴

（先快手混合牛油和砂糖，然後逐少加入蛋液和呍呢嗱油）

做法：

1. 將麵包材料混合後，搓至起筋便靜待發酵30 分鐘

2. 取出，按壓排氣，再發酵15分鐘

3. 把麵團分六份，造型後再發酵20分鐘

4. 飽面的甜醬材料舖上麵團

5. 放入己預熱焗爐， 焗20分鐘@170度

燉牛肉

燉牛肉其實係由英文 stew beef 譯過來的，和我們做開的炆牛腩類似，方法大同小異。有時用吓唔同口味去炆牛都無咁悶嘛，今次呢個牛腩仲唔駛醃架！

材料：
牛腩 $50-60
洋䓤 1個
紅甘筍 1條
西芹 1-2條
麵粉 2茶匙
月桂葉 (bay leaves) 1-2片

汁料：
茄膏 3湯匙
牛肉湯 300ml (如買不到牛肉湯也可用牛尾湯1罐）
水 ～少許

做法：
1. 洋䓤，紅甘筍，西芹切小片備用。
2. 燒熱油鑊，先炒洋䓤，紅甘筍和西芹至開始有點軟身。
3. 逐少加入麵粉，直至見唔到一粒粒的麵粉。
4. 再加入牛腩略炒，便可加埋茄膏，牛肉湯和月桂葉拌均。
5. 可加入少許水蓋過牛腩。如用牛尾湯的話，由於比較杰身，可加多點水。
6. 汁料滾起後轉慢火，炆半小時，熄火焗半小時，重複這樣炆法，炆三小時。
    如用真空煲就更方便，滾起後可放入煲內炆30-45分鐘，再重複拿出來滾一滾，焗一焗，都
    係要炆大約三小時。
7. 最後略以少許鹽和黑椒粉調味即成。
8. 上碟時把月桂葉拿走。

糖醋排骨

有次回娘家食飯，阿嘈夫人的爸爸做呢個餸，我一直都以為係比較複雜嘅餸。但看過爸爸的做法後，發覺原來咁簡單。真好，以後又可以多個簡單開胃餸了！

材料：
腩排 ＄40﹣50
薑，乾䓤 適量
紹酒 少許

調味料：
老抽 2湯匙，鎮江醋 2.5湯匙，冰糖 隨意，水 大約1碗
我會把老抽，醋及冰糖放入一個食飯碗內，加水至大約一飯碗滿。

做法：
1．腩排先出水，瀝乾水份備用。
2．燒熱油鑊，爆香薑和乾䓤，然後落腩排一起兜炒，灒少許紹酒。
3．兜炒片刻就可以續少加入調味料，滾起後轉慢火炆30分鐘。
4．熄火後焗30分鐘，之後重複慢火炆15分鐘焗15分鐘就可上碟了。

蒜蓉豆豉炒雞球

其實我覺得用蒜蓉豆豉做嘅餸好有出街食小菜的風味，又香又開胃呢！今次配埋四季豆一齊炒，無咁單調，除咗四季豆，都可以配其他蔬菜類炒架，例如甜豆，洋䓤，三色椒等。

材料：
雞翼 2磅
四季豆 一束（大約＄10）
豆豉 1湯匙
蒜蓉  2湯匙

雞翼醃料：生抽 1湯匙，老抽1湯匙，糖 1.5茶匙，酒及蔴油適量

做法：
1．四季豆洗淨切段。燒熱油鑊先炒四季豆至八成熟，備用。
2．另起油鑊爆香豆豉和蒜蓉，然後放入雞翼一齊炒。
3．最後落埋四季豆炒匀就可上碟。

白汁芝士炸魚塊

我兩個小朋友好鍾意食魚，但下下都蒸魚好似無乜新意，於是就做呢個餸，佢地食得好開心呀！其實做法好簡單，只係半煎炸魚塊時要少少時間啫。

材料：
急凍魚塊  4條
鹽，胡椒  少許

白汁：牛油 10g, 栗粉 1.5湯匙， 鮮奶 1杯，芝士 1片

做法：
1．魚塊抺乾切件，用少許鹽和胡椒略醃。
2．燒熱油鑊，同時在魚塊灑上栗粉，令其乾身及煎炸時不會咁容易散開。
3．煎至金黃色後，可盛碟待用。
4．煮白汁時，先慢火煮溶牛油，然後落栗粉，慢慢攪拌兩者至杰身。
5．再續少加入鮮奶，其間要不停攪拌，直至白汁成形，最後加入芝士再攪拌至完全溶掉。
6．可略加好少許鹽來調起味道。（當然唔加都得）
7．把白汁淋上魚塊即成。

茄汁蒜蓉煎豬扒

真係非常唔好意思呀！久別呢個blog 咁耐，事關都係...懶...囉，其實我差不多日日都有煮飯，好多時都有幫啲食物影相添，但就懶得處理啲相，請見諒！今次呢個豬扒酸酸甜甜，好開胃㗎！

材料：
梅頭豬扒 5﹣6塊
麵粉  大約3湯匙（煎豬扒前沾上的）
蒜頭，䓤  適量

汁料：
茄汁 3湯匙
喼汁 2茶匙
糖     2茶匙
蒜蓉 3湯匙
魚露 少許
水     少許

做法：
1．先把豬扒拍鬆，腌大約半小時（腌料為生抽，糖，蔴油，胡椒粉）
2．燒熱油爆香蒜頭，把剛沾上麵粉的豬扒煎香，然後轉中小火煎熟。
3．另將汁料煮至開始杰身，便可放入豬扒兜勻上碟。